रेऊ कथा स्पर्धा : उर्वरित महाराष्ट्न् विभाग-द्वितीय क्रमांक
वाट चढून आले सोपानदेवाने आकाशात वर पाहिले, सूर्य आता डोक्यावर आला होता. त्याची स्वत:ची सावली त्याच्या पायाखाली आली होती. कुठेतरी बसावं नि फिरकीच्या तांब्यातलं पाणी घटाघटा प्यावं असं त्याला वाटलं. दाट सावलीचं एकही झाड त्याला जवळपास दिसेना. उघड्या बोडक्या घाटांतून रस्ता चढण्यात त्याचा बराच वेळ गेला होता. जरा लांबवर नजर टाकली, अंतरावर एक दाट सावलीचं झाड त्याला दिसलं. झपाझप पावलं टाकत तो तिथं पोहोचला. दाट पानांच्या गर्दीतून एखाद दुसरा सूर्यकिरण खाली येत होता. बाकी सावली झकास होती. ऐसपैस पाय पसरून तो बुंध्याशी विसावला.
