एप्रिल २००७ चा अंक पोहोचला. 'संवाद'मधून 'ऑर्फेंीट'च्या निमित्ताने आपण मांडलेला मूल्यांचा मुद्दा खरोखरच फार महत्त्वाचा आहे. वैचारिक असहिष्णुता, संवेदनहीनता, वर्तमानातील आक्रमकता यांना प्रतिष्ठा मिळताना दिसते आणि मग आपले आवाज आपल्यातच जेमतेम ऐकायला येताहेत की काय असे वाटते. म्हणूनच आपले 'संवाद' हवे असतात. 'मी हरवत नाहीये' याचे आश्वासन देण्यासाठी.
सध्या महाश्वेतादेवींच्या कथांचे वीणा आलासे करीत असलेले अनुवाद 'साऱ्याजणी'ची वाट पाहायला लावत असतात. कथा मनाला टोचत टोचत राहतात.
- डॉ. प्रतिभा कणेकर, पालघर

आपल्या एप्रिलच्या 'मिळून साऱ्याजणी'मधला 'संवाद' वाचला. आपण 'ऑर्फेंीट' हे समलैंगिकता व इतर अल्प संख्याकांवर आधारित असलेल्या नाटकाबद्दल लिहिले आहे व अत्यंत संवेदनशीलपणे हा विषय मांडला आहे त्याबद्दल तुमचे मनापासून अभिनंदन.
अशा विषयांवर सहसा कुणी लिहीत नाही, त्यावर बोलायचे टाळतात किंवा या विषयाबद्दल पूर्वग्रहदूषित दृष्टिकोन घेऊन समलिंगी द्वेष्टे भाष्य करतात. आपण हा अज्ञानी माणसांचा रस्ता न धरता समलैंगिक लोकही माणसंच आहेत; त्यांचे प्रश्नही इतर प्रश्नांइतकेच महत्त्वाचे आहेत, हे आपण जाणलंत व ठामपणे मांडलेत.
आशा साठे यांनी जातीने लक्ष घालून या नाटकाबद्दल लिहायचे ठरवले, तसेच नयन कुलकर्णी यांनी असे नाटक बसवावे म्हणून प्रोत्साहन दिले, याबद्दल या दोघींचे मनापासून आभार.
सर्वांत शेवटची गोष्ट पण अत्यंत महत्त्वाची. दीपाताइंर्नी या नाटकात एक महत्त्वाची भूमिका केली. अशा विषयावरच्या नाटकात काम करण्याचे त्यांनी जे धैर्य दाखवले, नुसते मानवतेचे भाष्य न करता आपल्या कृतीतून त्यांनी त्यांची भूमिका मांडली याबद्दल त्यांचे मनापासून अभिनंदन व आभार.
आपल्यासारखे उदारमतवादी माझ्या पाठीशी आहेत हे पाहून माझे मनोबळ अजून उंचावले. आमचे अधिकार (गे राईट्स) मिळवण्याच्या लढ्यात आपल्या सारख्यांचा आधार असाच मिळत राहो, हीच प्रार्थना.
- समपथिक ट्न्स्ट, पुणे

मार्च महिलादिन विशेषांकातला डॉ. प्रिया आमोद यांचा 'शयनेषु रंभा' लेख वाचला. पती-पत्नीच्या संबंधातल्या इतक्या पाशवी घटना वाचून खूप अस्वस्थ व्हायला झाले.
आत्तापर्यंत अनेक डॉक्टरांचे आरोग्यविषयक माहिती देणारे लेख वाचत होतो; पण एका डॉक्टरने त्याच्या व्यवसायातले खाजगी आयुष्यातले सुन्न करणारे अनुभव लिहिले आणि तुम्ही ते वाचकांपर्यंत आणले, त्या लेखाखाली 'पुरुषांनो घाबरू नका!' ही वेदनेने भरलेली चौकट वाचली. 'मिळून साऱ्याजणी' म्हणजे स्वत:शी नव्यानं संवाद सुरू करणारं मासिक आहे; पण त्याबरोबर नव्यानं विचार सुरू करणारंपण मासिक आहे. वाचक म्हणून तुमची खूप आभारी आहे.
- एक वाचक, मुंबई

'मिळून साऱ्याजणी' मासिकाचा मार्च २००७ हा महिलादिन विशेषांक मुखपृष्ठापासून मलपृष्ठापर्यंत अत्यंत आशयसंपन्न, खास मेहनत घेऊन काढलेला, सर्वसमावेशक असा सर्वांगसुंदर वाटला.
'संवाद'मधील आत्मसन्मानाची ज्योत सदैव उजळीत ठेवा- 'माझी मी स्वतंत्र आहे' असे समजताना, कौटुंबिक पातळीवरील निकष लावून पाहणे, आपले छंद, आवडी-निवडी याविषयी सजगतेने फेरविचार करत असे अनेक छोटे-मोठे धडे गिरवत राहणे हा महिला मुक्ती दिनाचा खरा अर्थ व त्यासाठीचा प्रवास बोधप्रद. 'अंधारातील तारका' काहीशा न मळलेल्या अशा वैज्ञानिक संशोधनाच्या क्षेत्रात या स्त्रियांनी अनेक अडचणींना, पुरुषी मानसिकतेच्या आव्हानाला तितक्याच ताकदीने सामोरे जात आपले कर्तृत्व सिद्ध करून दाखवले. त्यांनी दिलेली चिवट झुंज व जपलेली जिद्द आजही तितकीच मोलाची प्रेरणादायी व मार्गदर्शक ठरावी.
'शयनेषु रंभा' हे स्त्रीरोगतज्ज्ञ डॉ. प्रिया आमोद यांना आलेले पेशंट स्त्रियांचे अनुभव अंगावर काटा आणणारे आहेत. २१ व्या शतकात 'महासत्ता' बनू पाहणाऱ्या भारतातील अशा शेकडो ज्ञात/अज्ञात स्त्रियांना नवऱ्यामुळे सोसावी लागणारी जीवघेणी, अवघड दुखणी पाहता, मनात भविष्याचा, आशावादी दृष्टिकोन कसा ठेवू शकणार? 'तरुण डॉट कॉम' अंतर्गत असामान्य धैर्यवान स्त्री प्रतिमा सिंगच्या बलात्कारी, खुनी बापाविरुद्धच्या लढ्याची कहाणीही खूप संतापजनक, तिरस्करणीय अशा वास्तवाविरुद्ध आहे. लेखिका मुक्ताबाई दीक्षित व तरुण मित्र झिबनॅक, दोन्ही व्यक्तिचित्रे बोलकी वाटली.
घरबसल्या महिला दिन विशेषांकाची अशी भेट दिल्याबद्दल धन्यवाद.
- प्रभा हर्डीकर, पुणे

मी आपल्या मासिकाची नियमित वाचक आहे. खूप आवडीने वाचते. मासिकातले लेख, स्त्रीच्या अंत:करणाचा ठाव घेणारे, विचार करायला लावणारे, मना-मनाशी संवाद साधणारे, वास्तवाला सामोरे जाणारे, जगण्यासाठी उभारी देणारे असतात. 'मिळून साऱ्याजणी'साठी असंख्य शुभेच्छा व्यक्त करते.
- अर्चना त्रिभुवन, पुणे

आपण संस्थेस मोफत अंक पाठविणे सुरू केले. मन:पूर्वक धन्यवाद. संस्थेच्या ग्रंथालयातील गुणवत्तापूर्ण पुस्तके, मासिके यामध्ये 'मिळून साऱ्याजणी' विशेष स्थान पटकावून महिलांची पहिली पसंती म्हणून सातत्याने वाचले जाते.
- कांचन परुळेकर, कोल्हापूर